Eur.
Erudite baccalarie, saluete.
Bacc.
Ohe! Euriale! Quid fles? Quid dolet tibi?
Eur.
Paucis vos alloquar, mihi fauete, queso.
Bacc.
Audacter quid vis dicito.
Eur.
Me nimis duriter esse percussum vobis conqueror.
Bacc.
Percussum? A quo, te hortor, dic mihi.
Eur.
A Petronio.
Bacc.
Quando?
Eur.
Modo.
Bacc.
Quam ob causam?
Eur.
Preterit me, Hercle!
Bacc.
Nihil molestie sibi feceras?
Eur.
Nihil prorsus.
Bacc.
Haud equidem credo.
Eur.
Testis mihi est Paulinus, qui an ipsum aliqua molestia affecerim vidit optume.
Bacc.
Vidistin’, Pauline?
Pau.
Perdocte Baccalarie, vidi!
Bacc.
Sed vbi is est?
Eur.
Abiuit.
Bacc.
Exploratum ne tibi est quo gressum tulerit?
Eur.
Domi eum esse existimo.
Pau.
Domi illum repertum iri arbitror, nam, dum sibi vobiscum minarer, ad patrios
lares sese inquit esse iturum.
Bacc.
Heus! Adolescens, tu ne custos es?
Cus.
Colende baccalarie, sum. Quid me vultis?
Bacc.
Petronij parentes nostin’?
Cus.
Noui optume.
Bacc.
Nostin’ etiam vbi habitant?
Cus.
Ad macellum qua itur ad Odere plateam.
Bacc.
Recte ais, eo cursita. Vise an Petronius domi sit. Quod si eum offenderis
accerse, et euestigio ad me vt veniat sibi nomine meo dicito.
Cus.
Faciam vt iubetis.
Bacc.
Vt rationem habere possis vbi me locorum conuenies, templum ingredior. Tu hic
mane et dum Petronius aderit mihi
[ 6 ]
continuo vt narres te hortor.
Eur.
Oro atque obsecro vos, nolite abire. Paululum more non sit vobis molestum.
Spero equidem illum per vos accersitum iam nunc esse affuturum.
Bacc.
Num quod ipse velis me facere oportebit? Tui ne iuris sum, fatue?
Pau.
Cohibe linguam, Euriale, et ne tibi succenseat
caueto. Sine ipsum abire, mos sibi gerendus est!
Eur.
Sed vereor illum, dum aduenerit et Baccalarium hic non offenderit, rursus abscessurum.
Pau.
Hoccine times?
Eur.
Istoc.
Pau.
Est mihi vtique tantum virium vt illum custode adductum detineam. Sed eccum video. Abi cito, accerse baccalarium.
Eur.
Eo propere. Tu da operam ne aufugiat.
Pau.
Abi intro, Petronij. Baccalarius iam aderit. Eamus nos quoque intro, custos.
Petr.
Quid ni ingrediar?
Pau.
Non sit tibi saltem mora longa: sentisces confestim.
Petr.
Mens mea mihi hoc presagiebat. Metuo edepol
mihi esse venturum aliquid maximi mali.
Pau.
Quid cesses ire intro?
Petr.
Audacter imperato. Faciam quid voles. Quid magis me vis facere, preceptor?
Pau.
Proterue quidem loqueris. Sed eccum baccalarium video: progreditur ex templo foras.
Petr.
Esto veniat, nusquam fugiam.
Bacc.
Que te mala crux agitat, sceleste? Qua fiducia ausus fuisti Eurialum
verberare? Nunquid memoria tenes quid, priusquam libertatem dedi, vetuerim:
ne quis alteri non facto solum verumetiam nec verbo aliquid molestie
iniurieue faceret? Meministin’ hortaminis mei?
Petr.
Charissime domine baccalarie, memini quidem, sed falsa memorat Eurialus:
nullo quippe eum digito attigi.
Bacc.
Negas?
Petr.
Nego, Hercle! Verum et per Iouem iuro me sibi nihil prorsus fecisse sed ipse
me falso semper compellat nomine asellumque vocat.
Pau.
Ah ne nega, multis equidem perspectum est quid mecum egeris.
Petr.
Non negem, cum nihil tibi mali vmquam fecerim?
Eur.
Verbis audio. Confidis te impune esse euasurum. Digito, fateor, vno non me
contigisti, verum pugno me vehementer percussisti vt mihi dentes pene exciderint!
Bacc.
Hem. Nouas rursus me presente incipitis lites. Litigare nolo ego vos. Nil
verbis opus est. Edissere, Euriale, quo te percussit.
Eur.
Ad malam hanc dexteram.
Bacc.
Mage profecto rubet quam leua: intumuit quoque parumper. Vidit ne quispiam?
[ 7 ]
Eur.
Paulinus vidit.
Petr.
Perchare baccalarie, non adhibete fidem Paulino maximopere vos rogo atque
oro. Odit me plurimum et quicquid culpe ipse committit in me conijcit.
Bacc.
Siccine est?
Petr.
Sic est.
Bacc.
Num plurimi aderant?
Eur.
Complures.
Bacc.
Illos mihi adduci volo vt quid factum sit eorum confessione intelligam.
Eur.
Nise, tu itidem ludo interfueras.
Bacc.
Nise.
Nis.
Adsum.
Bacc.
Perge dicere verum. Si falsa dixeris, excruciabere virgis in modum mirum.
Nis.
Que vidi dicam omnia.
Bacc.
Loquere mihi. Vidistin’ quod eum verberauit?
Nis.
Vidi.
Bacc.
Quapropter?
Nis.
Quid cause fuerit non queo comminisci, sed hoc quod testificatus sum,
profiteor. Vidi. Et dum eum afflictasset, plerique omnes confluerant acciti
alta voce Petronij clamitantis. "Adsitis iuuenes, adsitis!" Eurialus eiulat.
Bacc.
Quid tum postea?
Nis.
Preterit me, nam hinc abij.
Bacc.
Audistin’ hec, inique? Satis iam testimonij et signorum habeo. Affer virgas,
custos, et eas quidem lentas. Nam que arent prosiliunt cito.
Petr.
Charissime domine baccalarie, ignoscite mihi, per pientissimum vos oro deum!
Hei, ignoscite! Si quid imprudens deliqui posthac non faciam.
Bacc.
Ignoscam? Plenus malicie es, noui ego te optume, omnium edepol es
inquissimus. Trahatur. Vos corripite eum pedibus, et tenete duriter.
Petr.
Hoi! Hei! Hoi! Hei! O dilectissime baccalarie, parcius me corrigite, vos
maioreminmodum rogo! Hoi! Hei! Parcius corrigite!
Bacc.
Surge modo et abi in malam rem. Si olim percepero quod quempiam leseris, non
modo femur sed et dorsum tuum virgis despoliabo.
Eur.
Oh nimis factum bene!
