De Bello Civili By C. Julius Caesar
Edited by:
Renatus du Pontet
Oxonii e Typographeo Clarendoniano 1901
Perseus Documents Collection Table of Contents
C. Iuli Caesaris Commentariorum De Bello Civili, Liber Primus
C. Iuli Caesaris Commentariorum De Bello Civili, Liber Secundus
C. Iuli Caesaris Commentariorum De Bello Civili, Liber Tertius
Funded by The Annenberg CPB/Project |
|
Book 3
Ch. 1
[sect. 1]
Dictatore habente comitia Caesare consules
creantur Iulius Caesar et P. Servilius; is enim erat
[sect. 2]
annus, quo per leges ei consulem fieri liceret. his rebus confectis, cum fides tota Italia esset angustior, neque creditae pecuniae solverentur, constituit ut arbitri darentur; per eos fierent aestimationes possessionum et rerum, quanti quaeque earum ante bellum fuisset,
[sect. 3]
atque eae creditoribus traderentur. hoc et ad timorem novarum tabularum tollendum minuendumque, qui fere bella et civiles dissensiones sequi consuevit, et ad debitorum tuendam existimationem esse aptissimum
[sect. 4]
existimavit. item praetoribus tribunisque plebis rogationes ad populum ferentibus nonnullos ambitus Pompeia lege damnatos illis temporibus, quibus in urbe praesidia legionum Pompeius habuerat, quae iudicia aliis audientibus iudicibus, aliis sententiam ferentibus singulis diebus erant perfecta, in integrum restituit, qui se illi initio civilis belli obtulerant, si sua opera in bello uti vellet, proinde aestimans ac si usus esset,
[sect. 5]
quoniam sui fecissent potestatem. statuerat enim prius hos iudicio populi debere restitui quam suo beneficio videri receptos, ne aut ingratus in referenda gratia aut arrogans in praeripiendo populi beneficio videretur.
|
|