Fabianus
Quid causae est, Francisce, quod heri ludum non es ingressus?
Franciscus
Graviter ex capite laborabam, ut lucem ferre non possem.
Fabianus
Belle morbum excusas, quando vulgare iam est scholasticos, si quando vel
discendi sudorem horreant vel ferulam metuant, ignaviae suae valetudinem
praetexere, ut scholasticus morbus pro assimulato et conficio iampridem
in proverbium abierit.
Franciscus
Quid alii faciant, nescio; certe quod ad me attinet, mallem decies
ferulam pati quam semel in eum dolorem recidere, etiamsi vixdum plane
revalui. Sed quid tute iam hic versaris? An non hora iam est
praeceptoribus auscultandi?
Fabianus
Est, sed ob haec Christianorum quasi Bacchanalia tridui missionem nobis
dedit praeceptor; vetuit tamen gravi, si quis dicto audiens non fuerit,
proposita poena, ne quis opificum istorum manuariorum exemplo larva
personatus vicatim cursitet, quod haec insania cum bonis omnibus tum
maxime Christianis sit indigna.
Franciscus
At ego iamdudum larvam in hunc usum domi inclusam adservo.
Fabianus
Vide, quid agas, nam de larvis cautum est. Porro compotationes et
contiones civiles indulsit.
Franciscus
Parendum erit: alioqui post impermissa gaudia fortiter plorabimus.