P.
Quo nunc is?
V.
In hypocaustum.
P.
Quid eo?
V.
Hoccine rogandum est? non frigus sentis?
P.
Quotusquisque nunc non sentiat, cum sit adeo acerbum? Sed ego malim
me in culina calefacere.
V.
Atqui praeceptor vetuit.
P.
Non ignoro: sed rogabo veniam.
V.
Cur non vis in hypocausto calefieri?
P.
Vapores clibani tentant mihi caput, quod alioquin infirmum satis
habeo; unde fit, ut facile ex capite laborem.
V.
Ego quoque sic aliquando fui; sed paulatim assuefeci me ad ferenda
hypocausti incommoda.
P.
Et ego (ut spero) me assuefaciam: verum praestat id fieri horis
pomeridianis, ubi tantus aestus deferbuerit.
V.
Sed nunc tempus non est hic philosophandi diutius: iam mihi dentes
frigore crepitant.