F.
Pennae istae, quas circumfers, suntne venales?
M.
Etiam, si se emptor obtulerit.
F.
Ostende: vah, quam sunt
[ 14 ]
molles!
M.
Tales deciderunt ex alis nostrorum anserum: sed tenta diligenter;
sunt aliae aliis firmiores.
F.
Satis video quales sint: quot vis dare pro quadrante?
M.
Tantum sex.
F.
Quid ais? sex? mallem emere a mercatoribus, qui Lutetia et Lugduno
huc adferunt.
M.
Quasi nesciam quanti vendantur. Audivi ex fratre, qui dat operam
scribae huius civitatis, se emisse Lutetiae singulis assibus.
F.
Aliter Lutetiae, aliter Genevae vivitur: sed non opus est tot verbis,
vis dare duodecim?
M.
Hui! duodecim? quasi ego furatus sim.
F.
Istud non dico; sed vide num tibi placet conditio.
M.
Vis uno verbo dicam?
F.
Dic, quaeso; satis iam garritum est.
M.
Dabo tibi novem, modo promiscue de mea manu accipias.
F.
Nugas agis; ego sine delectu nollem accipere quindecim. Vale: alibi
inveniam satis.
M.
Per me licet. Heus! heus! redi.
F.
Cur me revocas?
M.
Accipe, si vis, octo; nec a me plures exspecta.
F.
Cedo totum fasciculum, ut deligam arbitratu meo.
M.
Tene; delige ut voles.
F.
Vide nunc, et, si libet, numera.
M.
Sunt viginti quatuor: constat numerus. Sed miror te nullas accepisse
ex ala extrema; sunt enim firmiores.
F.
Scio; sed habent caulem breviorem. Accipe pretium.
M.
Bene vertat Deus utrique nostrum.
F.
Idem tecum opto atque precor. Sed quando adferes meliores pennas?
M.
Nescio an meliores possim; sed, ut spero, brevi plures afferam, cum
ad vos domum proficiscar.
F.
Suntne vobis multi anseres?
M.
Triginta et amplius.
F.
Papae! quantus grex anserum! ubi pascuntur?
M.
Scies alias, non licet mihi diutius hic morari. Vale, France.
F.
Cura ut valeas, Marce.
