C.
Salvus sis, praeceptor.
P.
Auspicato advenis: quid nuntias?
C.
Orat te pater meus ut animi causa eamus una in hortos suos suburbanos.
P.
Ad eam rem nos invitat serenitas, et nunc sumus feriati. Sed quid
illic aspectu iucundum videbimus?
C.
Varias et pulchras arbores cum suis fructibus, item herbarum et
florum miram varietatem.
P.
Nihil est illis rebus hoc tempore iucundius.
C.
Ea est Dei erga nos beneficentia.
P.
Quam quidem assiduis laudibus prosequi debemus.
C.
Sed vereor ne patri in mora simus.
P.
Tantisper expecta dum togam muto ut sim ad ambulandum expeditior. Iam
paratus sum, nunc eamus. Sed estne domi pater?
C.
Prae foribus nos expectat.
P.
Bene res habet, vide ut eum decenter salutes.
C.
De hoc, te docente, saepe admoniti fuimus.